დაბადებული ვარსკვლავად: Jaguar-ის მოგზაურობა დროში
სამყაროში, რომელიც მუდმივად ცვალებადია, მხოლოდ ძლიერებს ძალუძთ გადარჩენა.
ძლიერთა შორის კი არიან ის ბრენდები, რომლებიც ავტოინდუსტრიის ისტორიას წერენ.
სწორედ ასეთია Jaguar-იც… ბრენდი, რომელმაც მეოცე საუკუნის მსოფლიოს
ეკლექტური, სირთულეებით სავსე, მაგრამ ტექნოლოგიურად პროგრესული
განვითარება საკუთარი ზურგით ზიდა და ამ უზომოდ საინტერესო გზაზე
იაგუარისთვის დამახასიათებელი ტემპიც არ შეუნელებია.
Jaguar-ის პირველი ავტომობილის შექმნიდან 90 წელი გავიდა და ეს ბრენდი უკვე ცხრა
ათეული წელია ასხეულებს თავის მთავარ იდეას და ავტომოყვარულებს შთააგონებს,
რომ სილამაზისა და სიჩქარის თანაარსებობა შესაძლებელია. თანაც, არამხოლოდ
როგორც კომპრომისი – არამედ როგორც კოლაბორაცია…
Jaguar-ი არასდროს ყოფილა უბრალოდ ავტომობილი – ის ყოველთვის იყო სენსაცია!
განსახიერება ბრიტანული ოსტატობისა, რომელიც მოუსვენარ, მეამბოხე სულს ერწყმის.
მისმა ადრეულმა ქმნილებებმა ( XK120, E-Type და სხვა) ყველა რეკორდი მოხსნა,
ჩამოშალა სტერეოტიპები და დაამტკიცა, რომ ავტოინდუსტრიაშიც კი შესაძლებელია
შექმნა არტი – ხელოვნების ნიმუში, რომელიც ბორბლებზე დგას და წარმოუდგენელ
სიჩქარეს ავითარებს.
ხელახალი დაბადება: ლეგენდის რებრენდინგი
სამყაროში, რომელშიც მეტამორფოზები და ტრანსფორმაცია ყოველდღიურობაა,
არაფერია გასაკვირი იმაში, რომ ლეგენდებსაც უწევთ გარდაქმნა. სამყარო იცვლება და
იცვლება წარმოდგენები ელეგანტურობაზე.
“Jaguar”-ი არ კმაყოფილდება მხოლოდ წარსულის დიდებითა და ნოსტალგიით. 2024
წელს, სრული რებრენდინგით მან შეცვალა არამხოლოდ ბრენდის სტილი, არამედ
წარმოდგენები სამყაროზე, რომელიც E-Type-იდან Type 00-მდე განვლილი გზის
ერთგვარი გამოძახილია და კიდევ ერთი დასტურია იმისა, რომ განვითარების გზაზე ეს
ბრენდი არ ჩერდება და მუდმივად ახერხებს ადაპტირებას.
რებრენდინგი და Jaguar-ის მეტამორფოზა განსაკუთრებულია არა მხოლოდ იმით, რომ
ბრენდის იდენტობა შეიცვალა, არამედ უფრო მეტად იმ ფაქტორით, რომ მისი სული
ხელუხლებელი რჩება. კვლავ იგივეა გულისცემა, ესთეტიკა, ენერგია… თუმცა იაგუარს
ახლა გეზი უფრო სუფთა, მშვიდი სამყაროსკენ აქვს აღებული.
ახალი ერა- საწვავის ხმას პროგრესის ხმა ცვლის
Jaguar-ის წარმოების შექმნის იდეა 1922 წელს ორ ბრიტანელ მოტომოყვარულს
დაებადა. ამ 103 წლის განმავლობაში ბრენდი მოტოციკლის მისაბმელების
წარმოებიდან უდახვეწილეს ელექტრომობილებამდე მივიდა. დღეს ბრენდისთვის
მორიგი რენესანსის ეპოქაა. გასულ წელს, I-PACE-მა, Jaguar-ის პირველმა სრულად
ელექტრო ავტომობილმა დაამტკიცა, რომ ამ ბრენდის ქვეშ ელექტრომობილების
წარმოების განვითარება იყო განაცხადი და არა უბრალოდ ექსპერიმენტი. მეტიც, ეს იყო
ძალიან თამამი განაცხადი სამყაროში, სადაც ემისიების შემცირება პრიორიტეტია და
ყოველდღე უფრო დიდია პასუხისმგებლობა მდგრად მომავალზე.
საწვავის წვის ხმას პროგრესის ჩუმი ხმა ცვლის. იმ პროგრესის, რომელსაც Jaguar-ი 103
წელია ქმნის და ეს ხელოვნების დონეზე აქვს აყვანილი. რამდენიმე თვის წინ Jaguar-მა
ელექტრომობილების ახალი, კონცეპტუალური სერია წარადგინა – ესეც თამამი
განაცხადი იყო! სერიის პირველ მანქანას სახელწოდებით Type 00 თავად კომპანიაში
აღწერენ, როგორც უნაკლოს, მოულოდნელსა და დრამატულს… კონცეპტმანქანა
პირველად Miami Art Week-ზე, ორ ფერში წარადგინეს: მაიამისებრ ვარდისფერში და
ლონდონურ ლურჯში, რაც ბრენდის ბრიტანული მემკვიდრეობის გამოძახილია…
და ეს მხოლოდ დასაწყისია!
ამ სერიით Jaguar-ი მსოფლიოს ჰპირდება ავტომობილებს, რომლებიც არ იქნება მხოლოდ
გადაადგილების საშუალება ან ფუფუნების საგანი. ეს იქნება გამოცდილება და
რეალობად ქცეული, კარგად ნაფიქრი მომავალი, რომელშიც მხოლოდ ელექტროძრავების
სიჩუმე იხმაურებს.